শ্রদ্ধেয় চাচা, পত্রে আমার শ্রেণীমত ছালাম ও দুয়া নিবায়, আশা করি বিদেশর মাটিত হখলরে লইয়া ভালাআপ্তা আছইন, ইমুকা আমিও আপনারার দুয়ার বরকতে দেশর মাটিত গাউদেশর হখলরে লইয়া কুনুরখমে ভালা আছি। পর সমাচার চাচা, আপনার চিঠি পড়িয়া অকানউ বুজতাম পারলাম যে, আপনারা বিদেশর মাটিত থাকলেও সময় অসময় গাউ দেশর সব খবরা খবর ঠিকমত রাখরা, কুশি অইলাম চাচা, অউযে লেখচইন চাচা ২০ রেকাত আর ৮ রেকাত তেরাবির নমাজ লইয়া কিছু মোল্লা মুন্সী অখলে নাচানাচি কররা, ইকান হাছা, আমরার দেশো অখন ইতা ধানর মাজে কিছু ছাট বারইগেছে চাচা! তবে যেগুইন্তে ইতা কররা ইতা বেশীর ভাগ অউ আগিয়া ঠিকমত পানি লয়না! মুতিয়া লামিজায় গলা পানিত! অউ অগুন্তর কাজকারবার, ইতার উদ্দেশ্য ভালানায় চাচা, ইতার উদ্দেশ্য দেশর ভিতরে একটা বিশৃংখল পরিবেশ সৃষ্টি করিয়া তারার বিদেশী প্রভু অখলরে কুশি করা! না অইলে কেনে অইন্য কুনু ধর্মে ধর্মীয় ফসাদ নাই? যা খালি আমরা মুসলমানর মাজে! যখন ইরাক, আফগান, মিশর, সিরিয়া আর ফিলিস্তিনির মত মুসলিম রাস্টর লাখ লাখ মুসলমান মারিয়া ধ্বংশ করের ইহুদি বেদিন অখলে, আর আমরা গরু খাইয়া মুসলমান অখল ৮রেকাত আর ২০ রেকাত তেরাবি লইয়া চিল্লা চিল্লি করি গলা ফাটাইরাম দেশর ভিতরে!

বুজা জায় আইজ আমরা মুসলমানর শত্রু মুসলমানরাই! যাই অউক চাচা, এর পরে জেখান লেখচইন দেশর মাটিত রমজান মাসো দিনেদুপুরে দুকানদারি করি খাইরা ও খাওয়াইরা, ইকানও হাছা, তবে চাচা, ই কতাকান জিগাইবার আগে একজরা বেশী কুশি অইলামনে জদি আপনারার মত বিদেশি অখলে রমজান মাসো অউ নাফরমান অগুন সহ গাউদেশর গরীব গরবা অখলরে ৫/১০ আজারগু টেকা দিয়া সায় সাহাইয্য করতা? নিজে খাইলনে বাইচ্চা কাইচ্চাগুন্তরেও খাওয়াইলনে, অয়তো ই পাপর রাস্তামুকাও আর গেলনানে, কিতা করবো, তারারো ভাইগ্য খারাফ, আমরার বাপ দাদায় আগে একটা ডিটান দিতা মনো আছেনি চাচা? আ-ঘাটে ঘাট অইব, আ-পথে পথ অইব, আ-মানুষ মানুষ অইব, ছিলানর দরজাত গিয়া মৌলভীর পুয়ায় আত পাতাইব! ইতা সবতাউ অখন আমরার চৌকর সামনে ঘটের চাচা! ই দেশো অখন বিয়াক্কলর সংখ্যা বেশী! জ্ঞানি গুনি জাত বাত বলিয়া ওখন আর কুনু শব্দ নাই, যার পকেটো টেকা আছে হে অখন মহাজ্ঞানী! জার ঘরো ভাত আছে, হে অখন মহা জাতিয়ালা! অনেক তালুকদারর পুয়ার তালুত ও অখন চুল নাই তেলর অভাবে! গুলামর গেছে অখন চব্বিশে কুড়ি! আগে গাইয়ে দুধ দিতো, অখন ডেকায়ও দুধ দেয়! না কইলে ফকিরও বঞ্চিত অয় দুইটেকা ভিক্ষা থাকি! ই অইল আমরার সোনার বাংলার বর্তমান অবস্হা! আর ঘুষ দুর্নীতি, মদ, জুয়া বেটিবাজি, ধর্ষণ, ছিনতাই ইতা আমরার সমাজর কিছু বড় বড় গইন্য মাইন্য জগইন্য ঠিকাদার অখলর উপর ছাড়িদিছি! ইতা তারা দেখবা! আমরা মাতাত গেলে তেনায় পানি ধরতনায়! জাই অউক চাচা, লেখতে লেখতে অনেখতা লেকিলাইলাম, লেখার মাজে কুনু ধরনের ভূল অইলে মাফ করিয়া দিবা, আর আশা করমু আগামী রমজানো দেশর গরীব গরবা অখলর মুকা সুনজর দিবা।

……ইতি আপনার ভাতিজা রমজান আলী।

লেখক : ছড়াকার।