বাবা রমজান আলী, আশা করি গাওঁ দেশর ছোট বড় দাদার ঘরর ভাই ও ভাই বিরাদ্দরর পুয়া পুড়িনতরে লইয়া কৌশলেই আছো? ইদিকে আমিও তোমা তানর দোয়ার বরকতে বিদেশর মাটিত হখলরে লইয়া মোটামুটি ভালা আছি, তবে পর সমাচার বাবা রমজান আলী, ইদানিং তোমা তানর দোয়ার মাঝে তেমন একটা মুরাদ পাইরাম না বলিয়াই মনে অর রে বাবা! কারন অইল, বারা থাকিয়া দেশর ভিতরে যে সমস্ত কু-কান্ড কু-কীর্তির কথা হুনরাম, ভিন ডিষ্টিকের মানুষের সামনে মুক দেখাইতেও আইজ লজ্জা লাগের ব্যাটা।

কিতার লাগি হুনো, আমরার বাপ দাদা চৌদ্দ গোষ্টি দেখলাম রমজান মাসো ২০ রেকাত তেরাবির নামাজ পড়লা, অখন হুনরাম আমরার এলাকাত কিছু সটকাট মোল্লা মুন্সি ওখল বারইচইন! তারা না কিতা ৮ রেকাত তেরাবির নামাজ পড়বার লাগি ফতুয়া টতুয়া দিরা! আমরার বাপ দাদার যুগো দেখলাম ব্যাটা যেতায় রমজান মাসো রোজা রাখতো না ইতারে কান্দো কলাগাছ বান্ধিয়া ও গাওঁ গেরামো চক্কর দেওয়াইতা!

অখন হুনি শুধু হাট বাজারো নায়, গাওঁ গেরামেও রমজান মাসো দিনে দুপুরে দোকান পাট খুলিয়া কুরতইল করিয়া হখলটিয়ে মিলিয়া খাইরা! কিছু মুরব্বি নামর কলংক অগুইন ও ভুলে অতার পক্ষে আছইন! কেউ প্রতিবাদ করলে তার লংগি লইয়াও বুঝি বাড়ীত যাইত পারেনা! ইভটিজিং, ধর্ষণ, নারী নির্যাতন, ওয়ান টেন, তীরখেলা টিরখেলা সহ আরো কতথা হুনরাম দেশো বারইছে, ইতা আমরার জমানাত আছিল নারে বাবা, যেগ্গে মদ গাইন্জা খাইতো দেখতাম লুকাই সাফাইয়া খাইতো, অখন হুনরাম বুড়ায়ও ছিলিম আর বেটিন লইয়া আসরো গিয়া হিল মওলা মারে!

দুই একজন ভালা মানুষ থাকলে তার আর দাম নাই, কেউ একজরা তারিফ ও তার করেনা, বেশীর ভাগ মানুষ আছে কারে দিয়া কারে লাগাইয়া লুটিয়া পুটিয়া খাইতো! অখন হুনোরে বাবা, রমজান মাসো তোমার জন্ম অইছিল করি শখ করিয়া তোমার নাম রাখছিলাম রমজান আলী, এই রমজান মাস আমরা মুসলমানর লাগি বড়ই তাতঁপর্য্য ও মহব্বতের মাস, এই রমজান মাসে শুধু মানুষ শয়তান ছাড়া আসমানী সব শয়তান হুনছি বান্ধা থাকে! তুমি একজন মুমিন হিসাবে এই মানুষ শয়তান থাকি বাচিঁয়া, আমল আর ঈমানের সহিত পরকালের চিন্তা মাথায় রাকিয়া চলাফিরা করিও। আল্লাহ সব সময় তোমার সহায় থাকউকা।

…..ইতি তোমার চাচা মনু মিয়া।

লেখক : শেখ ফজর রহমান, ছড়াকার।